Америкийн ард түмний дэмжлэгээс бүрдсэн АНУ-ын Олон улсын хөгжлийн агентлагийн санхүүгийн дэмжлэгтэйгээр Азийн сангаас хэрэгжүүлж буй “Монгол Улсад хэвлэл мэдээлэл, иргэний нийгмийн салбарыг бэхжүүлэх нь” (MACSS) төслийн хүрээнд орон нутгийн ИНБ-уудын “Хэвлэл мэдээлэл, мэдээллийн суурь боловсрол”-ын мэдлэг, ойлголтыг нэмэгдүүлэх ажлыг Хэвлэлийн Хүрээлэнгийн зүгээс хийж байгаа болно.
Энэхүү ажлын хүрээнд Төвийн бүсийн зарим аймгуудын ИНБ-уудад зориулсан сургалтыг 9 сарын 21-22-ны өдрүүдэд Дархан-Уул аймагт зохион байгуулсан бөгөөд сургалтад Сэлэнгэ, Булган, Орхон, Дархан-Уул аймгийн төлөөллүүд оролцлоо.
Тус сургалтын оролцогчид хэвлэл мэдээлэл, мэдээллийн суурь боловсролын үндсэн ойлголт, шаардлага хэрэгцээ, ач холбогдол, уламжлалт болон шинэ мэдээллийн хэрэгслийн онцлог, түүний ялгаа, мэдээллийн ёс зүй, шүүн тунгаах сэтгэлгээг хөгжүүлэх талаар мэдлэгээ тэлж. подкаст хийх, гэрэл зураг авах, постер хийх зэрэг мэдээлэл бүтээх ур чадварт суралцлаа.
Ангилал: Мэдээ
-
Төвийн бүсийн зарим аймгийн Иргэний Нийгмийн Байгууллагын төлөөллүүд хэвлэл мэдээлэл, мэдээллийн суурь боловсролын талаарх мэдлэгээ дээшлүүллээ
-
СЭТГҮҮЛЧИД ГАР УТСААРАА КОНТЕНТ БЭЛТГЭХ УР ЧАДВАРАА САЙЖРУУЛЛАА
Хэвлэлийн Хүрээлэн, Нийслэлийн Сэтгүүлчдийн Нэгдсэн Холбоотой хамтран 2024 оны 9 сарын 15-ны өдөр сэтгүүлчдэд зориулан гар утсаараа контент бэлдэх, эвлүүлэх чадвар /МОЖО/ сургалтыг амжилттай зохион байгууллаа.
Энэхүү сургалтад хэвлэл мэдээллийн байгууллагын сэтгүүлч, зураглаач, төрийн зарим байгууллагын хэвлэлийн төлөөлөгч гээд 40 орчим хүн хамрагдсан бөгөөд энэ удаагийн сургалт нь Итгэлт хамба, Байгаль далай, ОХУ-ын Улаан-Үд хотын аялалтай хамтатган хийснээрээ онцлог байв.
Цаашид хоёр байгууллага хэвлэл мэдээллийн байгууллагын ажилтан, сэтгүүлчдийг чадавхжуулах хүрээнд сургалт, уулзалт, хэлэлцүүлгийг зохион байгуулах тал дээр хамтран ажиллах болно. -
ХЭВЛЭЛИЙН ХҮРЭЭЛЭНГИЙН УДИРДАХ ЗӨВЛӨЛИЙН ЭЭЛЖИТ ХУРАЛ БОЛЛОО
2024 оны 9 сарын 12-ны өдөр Удирдах зөвлөл хурлаа хийж Хэвлэлийн Хүрээлэнгийн хагас жилийн үйл ажиллагааны тайлан, төсвийн гүйцэтгэлийг хэлэлцэж, гуравдугаар улирлын төлөвлөгөө, төсвийг батлав.
2024 оны хагас жилийн хугацаанд сэтгүүлч, хэвлэл мэдээллийн ажилтнуудад зориулсан урт, богино хугацааны сургалт арван тав, уулзалт, хэлэлцүүлэг арван гурвыг зохион байгуулж, арван төрлийн судалгааг хэрэгжүүлж, ном, гарын авлага тавыг боловсруулж хэвлэв. Эдгээр ажлыг Хэвлэлийн Хүрээлэнгийн өөрийн санхүүжилтээр болон Internews/Earth Journalism Network, ЮНЕСКО, Хүүхдийг Ивээх Сан, Азийн сан / АНУ-ын ОУХА, IREX, зэрэг түншлэгч байгууллагуудын дэмжлэгтэйгээр хэрэгжүүллээ.
2024 оны гуравдугаар улиралд IREX/USAID-ийн дэмжлэг бүхий Эрэн сурвалжлах сэтгүүл зүйн үндэсний тэтгэлэгт хөтөлбөрийн үргэлжлэл ажлууд, Гадаад мэдээний сэтгүүлч, тоймчдын чадавхжуулах хөтөлбөр болон Монголын Хэвлэл мэдээллийн сүүлийн 10 жилд судалгааны тайланг гаргах гэх мэт ажлыг хийнэ. Эдгээр болон бусад 14 төрлийн ажлыг энэ улиралд багтаан хэрэгжүүлэхээр төлөвлөж буйг Удирдах зөвлөлөөс дэмжиж, тодорхой ажлууд дээр зөвлөгөө, чиглэл өгөв. -
ГАДААД МЭДЭЭНИЙ ТОЙМЧ, СЭТГҮҮЛЧ, ОРЧУУЛАГЧДАД ЗОРИУЛСАН ХОЁР ДАХЬ УДААГИЙН СУРГАЛТ БОЛЛОО
Хэвлэлийн Хүрээлэнгээс Сэтгүүл зүйн инновац хөгжлийн үүр төвтэй хамтран зохион байгуулж буй Гадаад мэдээ бэлтгэдэг сэтгүүлч, орчуулагч, тоймчдод зориулсан хоёр дахь сургалт өчигдөр боллоо.
Сургалтыг Атлантын Зөвлөлийн Глобал Хятадын төвийн судлаач, сургагч багш Нива Яу удирдан явуулав. Багш хайлтын системийн оновчлолоор дамжуулан хилийн чанад дахь бичгийн эх сурвалжийг өргөжүүлэх, нээлттэй эх сурвалжийг зөв олж ашиглах, зарим орны онцлогтой мэдээлэл харилцааны талаар хэлэлцүүлэг өрнүүлж, оролцогчид багаар ажиллалаа.
Энэхүү хөтөлбөрийг Бүгд Найрамдахчуудын Олон Улсын Хүрээлэнгийн дэмжлэгтэйгээр хэрэгжүүлж буй “ГАДААДЫН АВТОРИТАР НӨЛӨӨЛЛИЙГ БУУРУУЛАХАД СЭТГҮҮЛ ЗҮЙН ҮҮРЭГ ОРОЛЦООГ БЭХЖҮҮЛЭХ” төслийн хүрээнд зохион байгуулж байна.
Хөтөлбөрийн хүрээнд есдүгээр сарын 6-20-ны өдрүүдэд цуврал хэлэлцүүлгүүд зохион байгуулна.
Лавлах утас: 350002, 97070709 -
“ХАМТЫН ЭРЭН СУРВАЛЖИЛГА” NETWORKING EVENT-2 БОЛЛОО
АНУ-ын Олон улсын хөгжлийн агентлагийн санхүүгийн дэмжлэгтэйгээр Азийн сан, Олон Улсын судалгаа, солилцооны хүрээлэн (IREX)-ээс хэрэгжүүлж буй “ХАМТЫН ЭРЭН СУРВАЛЖИЛГА” хөтөлбөрийн хүрээнд зохион байгуулагдаж буй энэхүү арга хэмжээ нь “Эрэн сурвалжлах сэтгүүл зүй дэх эрх зүйн хамгаалалт, сорилт бэрхшээл” сэдвийн хүрээнд салбарын хуульч мэргэжилтэн болон туршлагатай сэтгүүлчдийг оролцуулан хэлэлцүүлэг өрнүүлэх, туршлага солилцох санал, зөвлөмж авах зорилготой.
Нийт хөтөлбөрт хамрагдаж буй суралцагчдад өөрийн туршлагаа хуваалцахаар “Эрх зүйн гүүр” хуулийн фирмийн өмгөөлөгч Д.Оросоо үйл ажиллагааны эхэнд эрэн сурвалжлах сэтгүүлчдэд тулгардаг хуулийн зохицуулалт, эрх зүйн эрсдлийг даван туулах боломжийн талаар илтгэл тавьсан бол үргэлжлүүлэн “Өнөөдөр” сонины “Эрэн сурвалжлах, экологийн мэдээллийн алба”-ны дарга Г.Цолмон, сэтгүүлч Д.Мягмаржаргал, А.Ичинхорлоо нар хэлэлцүүлэгт оролцлоо.
Мөн энэ өдрийн төгсгөлд “Гаднын хэвлэлд нийтлэлээ хэрхэн гаргах вэ?” сэдэвт танилцуулгыг чөлөөт сэтгүүлч Т.Ананд удирдан зохион байгуулав. -
“ХАМТЫН ЭРЭН СУРВАЛЖИЛГА” ДӨРӨВ ДЭХ БАГЦ СУРГАЛТ БОЛЛОО
Хэвлэлийн Хүрээлэн нь сэтгүүлчид, хэвлэн нийтлэгчид, иргэний нийгмийн байгууллагуудад чиглэсэн үндэсний эрэн сурвалжлах сэтгүүл зүйн тэтгэлэгт хөтөлбөрийг хэрэгжүүлж байна.
Хөтөлбөрийн дөрөв дэх удаагийн багц сургалт энэ долоо хоногт боллоо. Сургалтаар эрэн сурвалжлах ахисан түвшний судалгаа буюу бүтээлийн судалгааны төслийн үр дүнг тооцож, таамаглалын үндэслэл нотолгоо хэрхэн бүрдсэнийг шинжилж, тэдгээрийн учир холбогдлыг дахин шалгаж, хянаснаар өгүүлэл бичих, нэвтрүүлэг бүтээх сүүлийн үе шат руу шилжихэд оролцогчид бэлэн боллоо.
Хөтөлбөрийн тухайд:
Америкийн ард түмний дэмжлэгээс бүрдсэн АНУ-ын Олон улсын хөгжлийн агентлагийн санхүүгийн дэмжлэгтэйгээр Азийн сан, Олон Улсын судалгаа, солилцооны хүрээлэн (IREX)-ээс хэрэгжүүлж буй “Монгол Улсад хэвлэл мэдээлэл, иргэний нийгмийн салбарыг бэхжүүлэх нь” (MACSS) төслийн хүрээнд энэхүү хөтөлбөр хэрэгжиж байна.
Хөтөлбөрт эрэн сурвалжлах сэтгүүл зүйн цуврал сургалт, IJ lab дадлага, интерактив уулзалт, хэлэлцүүлэг, менторинг, бүтээлийн тэтгэлэг, хууль эрх зүйн иж бүрэн дэмжлэг зэрэг багтана.
Тэтгэлэгт хөтөлбөр ирэх ирэх сард өндөрлөнө. -
ГАДААД МЭДЭЭ БЭЛТГЭДЭГ СЭТГҮҮЛЧ, ОРЧУУЛАГЧ, ТОЙМЧДОД ЗОРИУЛСАН ХӨТӨЛБӨР ЭХЭЛЛЭЭ
Хэвлэлийн Хүрээлэнгээс Сэтгүүл зүйн инновац хөгжлийн үүр төвтэй хамтран гадаад мэдээ бэлтгэдэг сэтгүүлч, орчуулагч, тоймчдод зориулсан хөтөлбөр эхлүүллээ. Энэхүү хөтөлбөрийг Бүгд Найрамдахчуудын Олон Улсын Хүрээлэнгийн дэмжлэгтэйгээр хэрэгжүүлж буй “ГАДААДЫН АВТОРИТАР НӨЛӨӨЛЛИЙГ БУУРУУЛАХАД СЭТГҮҮЛ ЗҮЙН ҮҮРЭГ ОРОЛЦООГ БЭХЖҮҮЛЭХ” төслийн хүрээнд зохион байгуулж байна.
Сүүлийн жилүүдэд олон улсын мэдээ, нийтлэл бичдэг сэтгүүлчдэд зориулсан сургалт тогтмол хийгдэхгүй байгаа бөгөөд нөгөө талд олон улсын нөхцөл байдал, бүс нутгаас дэлхийн хэмжээнд нэлээд өөрчлөгдөж байна. Иймд шинэ залуу тоймчид, сэтгүүлчдэд энэ талаар мэдлэг, мэдээлэл өгөх шаардлагатай байна.
Хөтөлбөрийн хүрээнд цуврал хоёр сургалт, гурван уулзалт зохион байгуулахаар төлөвлөж байна. Сургалтаар сэтгүүлч, орчуулагч, тоймчдын хамтын ажиллагааг дэмжих, олон улсын мэдээний олон ургалч байдлыг хангах, аюулгүй байдал, олон нийтийн ашиг сонирхлыг хамгаалахад сэтгүүл зүйн үүрэг оролцоог дэмжих зорилготой.
Сургалтын агуулгыг нарийвчилбал гадаадын зарим түгээмэл эх сурвалжийн редакцын бодлогын талаарх ойлголтыг дээшлүүлэх, авторитар нөлөөлөл, мэдээллийг гуйвуулах арга технологи, баримтыг нягтлан шалгах хэрэглүүр, Хятад улсын талаарх нээлттэй мэдээллийн эх сурвалж болон тэдгээрийн онцлог зэргийн тухай шинэ мэдлэг өгөх, Монголын уламжлалт хэвлэл мэдээллийн хэрэгсэл болон цахим орчинд түгээж буй гадаад мэдээний зарим жишээ кэйсийг хэлэлцэх, Монгол улсын гадаад бодлого, харилцааны зарим асуудлаар холбогдох мэргэжлийн хүмүүстэй уулзаж, хэлэлцүүлэг өрнүүлэх, улмаар гадаад мэдээний сэтгүүлчдийн үндэсний сүлжээ байгуулах асуудлыг хэлэлцэж байна.
Дараагийн сургалт энэ сарын 27-нд болох бөгөөд Атлантын Зөвлөлийн Глобал Хятадын төвийн судлаач, сургагч багш Нива Яу хичээлийг удирдан явуулна.
Лавлах утас: 88098020, 97070709 -
ХЭВЛЭЛ МЭДЭЭЛЭЛ, МЭДЭЭЛЛИЙН СУУРЬ БОЛОВСРОЛЫН ҮНДЭСНИЙ СҮЛЖЭЭНИЙ ЭЭЛЖИТ УУЛЗАЛТ БОЛЛОО
Монгол улсад хэвлэл мэдээлэл, мэдээллийн суурь боловсролыг нийгмийн бүхий л хүрээнд хөгжүүлэхэд хувь нэмэр оруулж, шийдвэр гаргагч болон олон нийтийн мэдлэг, ойлголт, хандлагыг дээшлүүлэх, бодлого шийдвэрт нөлөөлөхөд оролцогч талуудын нэгдмэл хүчин чармайлт, хамтын ажиллагааг хөгжүүлэн бэхжүүлэх зорилготой Үндэсний сүлжээг 2021 онд ЮНЕСКО болон Хэвлэлийн Хүрээлэнгийн санаачилгаар байгуулсан билээ.
Тус сүлжээнд Боловсролын Хамтын Ажиллагааны Нийгэмлэг, БСШУСЯ-ны харьяа Насан туршийн боловсролын үндэсний төв, “Бүх нийтийн боловсролын төлөө” Иргэний Нийгмийн Үндэсний Эвсэл, Глоб интернэйшнл төв, Д.Нацагдоржийн нэрэмжит төв номын сан, Гэр бүл, хүүхэд залуучуудын хөгжлийн газар, МҮОНТВ-ийн Гэр бүлийн суваг, УИХ-ын Тамгын газрын ХМОНХХ, Faro foundation Mongolia, Харилцаа Холбооны зохицуулах хороо, Хүүхэд Хамгааллын Үндэсний сүлжээ, ХХМТГ-ын Радио, телевиз, нийгмийн мэдээллийн сүлжээний бодлого, зохицуулалтын газар, eMongolia академи багтдаг бөгөөд ээлжит уулзалт өнөөдөр Монгол Улсын Үндэсний номын сангийн салбарт боллоо.
Сүлжээний гишүүдэд салбар номын сангийн үйл ажиллагаа, мэдээллийн боловсролтой холбогдох ажлуудыг танилцуулж, мэдээлэл хуваалцлаа.
Эх сурвалж: Монгол Улсын Үндэсний номын сан
-
ИРГЭНИЙ НИЙГМИЙН БАЙГУУЛЛАГУУДАД ЗОРИУЛСАН ХММСБ-ЫН ОЙЛГОЛТ, МЭДЛЭГ ӨГӨХ СУРГАЛТЫГ АМЖИЛТТАЙ ЗОХИОН БАЙГУУЛЛАА
Америкийн ард түмний дэмжлэгээс бүрдсэн АНУ-ын Олон улсын хөгжлийн агентлагийн санхүүгийн дэмжлэгтэйгээр Азийн сангаас хэрэгжүүлж буй “Монгол Улсад хэвлэл мэдээлэл, иргэний нийгмийн салбарыг бэхжүүлэх нь” (MACSS) төслийн хүрээнд Иргэний нийгмийн байгууллагуудын Хэвлэл мэдээлэл, мэдээллийн суурь боловсролын ойлголт, мэдлэг өгөх туршилт сургалтыг 7 дугаар сарын 2-3-ны өдрүүдэд зохион байгууллаа.
Сургалтад иргэний нийгмийн байгууллагуудын мэргэжилтэн, хэвлэл мэдээлэл олон нийттэй харилцан ажилтнуудаас бүрдсэн 15 хүн оролцлоо. Тэд хэвлэл мэдээлэл, мэдээллийн суурь боловсролын тухай, шаардлага хэрэгцээ, ач холбогдол, хэвлэл мэдээллийн хэрэгсэл, түүний онцлог, мэдээллийн ёс зүй, шүүн тунгаах сэтгэлгээг хөгжүүлэх нь яагаад чухал талаар суралцав. Мөн Аудио агуулга буюу Подкаст хэрхэн хийх, гэрэл зураг авах, анхаарал татахуйц постер хийх гэх мэт мэдээлэл бүтээх ур чадвараа сайжруулахаас гадна эдгээр агуулгыг хэрхэн сайжруулж болох үнэлгээг өглөө.
Энэхүү туршилт сургалтын үр дүнд үндэслэн сургалтын агуулга мэдээллийг сайжруулах бөгөөд үүний дараагаар орон нутгийн иргэний нийгмийн байгууллагад зориулсан сургалтыг цувралаар зохион байгуулах юм.
