Хэвлэл мэдээллийн хуульчдын үндэсний сүлжээний энэ оны анхдугаар уулзалт боллоо. Уулзалтад Хүний эрхийн үндэсний комисс, Монголын хуульчдын холбоо, Монголын өмгөөлөгчдийн холбоо, Монголын шүүгчдийн холбоо, Монголын Эмнести Интернэшнл, Глоб Интернэшнл олон улсын хүний эрхийн байгууллага, Хэвлэлийн Хүрээлэнгийн төлөөлөл оролцлоо.
Энэ удаагийн уулзалтаар хэд хэдэн асуудлыг хэлэлцсэн бөгөөд юун түрүүнд УИХ-ын 2024 оны сонгуульд өрсөлдөх 35 нам, эвслийн мөрийн хөтөлбөрт үг хэлэх, үзэл бодлоо илэрхийлэх эрхийг хязгаарлахын эсрэг агуулга зааж оруулах уриалга боловсруулан хүргүүлэхээр тогтлоо. Мөн яг одоо олон нийтийн хэлэлцүүлгийн сэдэв болоод буй Өргөн нэвтрүүлгийн тухай хууль болон бусад асуудлаар санал боловсруулахаар болов.
Хэвлэл мэдээллийн хуульчдын сүлжээ нь хэвлэл мэдээллийн эрх чөлөөний чиглэлээр мэргэжлийн мэдлэг туршлага солилцох, гишүүдийн чадавхыг дээшлүүлэх, хэвлэл мэдээллийн хуулийн шинэчлэлийн ажилд шууд оролцох, зөрчилтэй, нийгэмд тулгамдсан асуудлаар хамтын байр сууриа нэгтгэх, хэлэлцэх талбарыг бий болгохын төлөө нэгдэл юм.
Ташрамд дурдахад Хэвлэлийн Хүрээлэнгээс “Үг хэлэх, Үзэл бодлоо илэрхийлэх эрх чөлөө: Хууль тогтоогч, эрх зүйн шинэчлэлийг дэмжигчдэд зориулсан гарын авлага”-ыг Монгол хэлнээ хөрвүүлж үг хэлэх үзэл бодлоо илэрхийлэх эрх чөлөөг дэмжигч хуульч, эрх зүй судлаач, өмгөөлөгч, сэтгүүлчдэд зориулан түгээж байна.
Цахим хувилбар болон хэвлэмэл гарын авлагыг авах боломжтой.
Утас 11-350002